أخبار لايت: مع اقتراب رمضان.. أسعار البلح والتمور كام في السوق والأونلاين؟

مع اقتراب شهر رمضان، البلح والتمور بيكونوا موجودين بشكل أساسي على كل سفرة إفطار، وعلشان كده ناس كتير بدأت تدور على الأسعار قبل الزحمة.

الأسعار في السوق حاليًا بتختلف حسب النوع والجودة والوزن، لكن نقدر نقول إن البلح السيوي بيبدأ في العبوات الكبيرة حوالي 400 جنيه لـ5 كيلو، وفي عبوات أصغر زي عبوتين وزن الواحدة 700 جرام السعر بيكون في حدود 140 جنيه.

أما الرطب السكري، فأسعاره أعلى شوية، وعلبة الرطب بتوصل لحوالي 600 جنيه حسب الجودة، وفي البلح المحشي بالمكسرات أو المغطى بالشوكولاتة، الأسعار بتتراوح ما بين 135 و210 جنيهات حسب الوزن ونوع الحشو. 

بالنسبة للأنواع الشعبية اللي ناس كتير بتعتمد عليها طول الشهر، زي البلح الشامية أو الأبريمي أو المركابي، أسعارها بتبدأ من 16 جنيه وبتوصل لحد 50 و60 جنيه حسب النوع والجودة،أما بلح أبيض غزال، فسعره غالبًا بيتراوح ما بين 18 و48 جنيه.

سواء الشراء من السوق أو أونلاين، الأسعار متقاربة لكن الفرق بيبقى في العروض والتعبئة، علشان كده المقارنة مهمة قبل الشراء.

والأهم إنك تختار بلح طازة، ملمسه ناعم، وطعمه سكري طبيعي، وتحاول تنوّع بين السيوي، الرطب، والبلح المحشي علشان يناسب كل الأذواق.

اصل البلح مش بس أكل بنفطر عليه، ده طقس رمضاني ثابت، ومع معرفة الأسعار بدري، تقدر تجهز احتياجاتك من غير ضغط وتستقبل رمضان وانت مطمن.