لو بتدور على عربية بسعر أقل من السوق ومش فارق معاك فخامة قد ما يهمك السعر؟
يبقى التقرير ده معمول علشانك.. الدولة أعلنت عن مزاد علني جديد لبيع سيارات حكومية.. مزاد مفتوح قدام الكل، وأسعار دايمًا بتكون أقل بكتير من أسعار السوق.
المزاد الجاي هيقام يوم 11 فبراير 2026 والجلسة هتبدأ الساعة 12 ظهرًا والمكان: قاعة نادي الجيزة الرياضي بشارع البحر الأعظم.
طيب إيه نوع العربيات اللي موجودة؟ المزاد مش ملاكي بس، فيه نقل، ميكروباص، أتوبيسات، تروسيكلات. يعني مناسب للأفراد وكمان للتجار وأصحاب الشغل.
أما بقى الماركات؟ القايمة طويلة ومغرية .. منها: تويوتا، هيونداي، كيا، شيفروليه، رينو، فيات، أوبل، سوزوكي، مازدا، سكودا، فولكس، دايو، بيجو، وكمان ماركات صيني وكوري وياباني، بموديلات وسنين مختلفة. يعني ممكن تلاقي عربية تمشيك، أو عربية شغل، أو حتى صفقة إعادة بيع.
طيب تشترك إزاي؟ الموضوع بسيط بس له شروط، أول حاجة لازم تشتري كراسة الشروط، وسعرها حوالي 400 جنيه ومينفعش تدخل المزاد من غيرها.
ثاني حاجة: تأمين دخول المزاد 50 ألف جنيه وده بيتردلك لو ما كسبتش أي صفقة. ولو المزاد رسي عليك.. بتدفع 30% من تمن العربية فورًا، وباقي المبلغ خلال 15 يوم.
الميزة المهمة بقى، البيع من غير عمولة، وكله رسمي وعلني ووفقًا للقانون. يعني لو معاك سيولة وبتدور على عربية بسعر أقل من السوق مزادات السيارات الحكومية بتكون فرصة حقيقية.. بس لازم تروح فاهم ومجهز نفسك.
التعليقات