هو ايه اللي بيحصل في صادرات الملابس الجاهزة؟ وازاي قطاع كان بيتحرك بهدوء بقى فجأة من أسرع القطاعات نموا؟
وليه الأرقام اللي طالعة دلوقتي بتخلي السوق كله يقف عندها؟ وهل اللي حاصل ده طفرة مؤقتة ولا بداية مسار جديد للاقتصاد المصري؟
اللي حصل في صادرات الملابس الجاهزة مش رقم عابر ولا صدفة.. احنا بنتكلم عن قطاع قدر يحقق نمو واضح بنسبة 22 في المية خلال سنة واحدة بس، الصادرات وصلت لحوالي 3 مليار و400 مليون دولار، بعد ما كانت حوالي 2 مليار و800 مليون دولار.
وده معناه إن القطاع قدر يزود أكتر من نص مليار دولار في سنة، وفي ظروف عالمية مش سهلة، وفي منافسة شرسة من دول كبيرة في الصناعة دي.
القفزة دي وراها أكتر من سبب.. أولها إن الصناعة نفسها في مصر بقت أعمق مش مجرد تصنيع لحساب الغير.
لكن فيه تركيز على زيادة القيمة المضافة، وتوسيع قاعدة المصانع، وتحسين الجودة، وده خلا المنتج المصري يبقى قادر ينافس في أسواق صعبة، ويوصل لأسواق كانت شبه مغلقة قبل كده.
كمان اللافت إن الزيادة الكبيرة دي حصلت من غير ما يدخل إنتاج الاستثمارات الأجنبية الجديدة اللي مصر جذبتها السنة اللي فاتت.. يعني الأرقام دي طالعة من الطاقة الحالية، ومن توسعات الشركات القائمة، ومن إعادة تنظيم سلاسل الإنتاج والتوريد، وده مؤشر إن اللي جاي ممكن يكون أكبر.
الدولة لعبت دور مهم في اللي حصل توفير أراضي صناعية جاهزة تبسيط إجراءات جمركية وتسهيل حركة التصدير وبرنامج دعم قوي للصادرات.. كل ده عمل بيئة مريحة للمصانع وخلا المستثمر يركز في الإنتاج بدل ما يضيع وقته في إجراءات.
كمان مهم نفهم إن مصر قدرت تتجاوز دول كتير في أفريقيا والمنطقة العربية في صادرات الملابس الجاهزة وده معناه إن الصناعة المصرية بقت رقم صعب وبتتحرك في اتجاه إنها تبقى مركز إقليمي للتصنيع والتصدير، خصوصا مع ميزة القرب من الأسواق الأوروبية واتفاقيات التجارة وتكلفة التشغيل التنافسية.
الأهم بقى إن التوقعات الجاية أقوى.. القطاع مرشح إنه يزود صادراته بأكتر من مليار دولار خلال السنة الحالية، يعني ممكن نوصل لحوالي 4 مليار و400 مليون دولار.. وده رقم تاريخي لأول مرة يوصل له القطاع.
ومش بس كده.. السنين التلاتة اللي جايين متوقع فيهم طفرة أكبر.. مع دخول إنتاج استثمارات أجنبية مباشرة، ومع توسعات جديدة لشركات مصرية كبيرة.
اللي بيحصل في الملابس الجاهزة مش مجرد قصة قطاع واحد.. دي رسالة إن الصناعة التصديرية لما يتوفر لها مناخ مناسب، بتقدر تتحرك بسرعة، وتجيب عملة صعبة، وتخلق فرص عمل، وتزود قدرة الاقتصاد على الصمود.
وعشان كده القفزات اللي بنشوفها دلوقتي مش مفاجأة.. دي نتيجة مسار، وشغل طويل، ومؤشرات بتقول إن القطاع ده لسه عنده كتير يقدمه، وإن صادرات الملابس الجاهزة بقت واحدة من أهم أوراق القوة في الاقتصاد المصري في المرحلة الجاية.
التعليقات