في الفترة الأخيرة عمليات النصب على عملاء البنوك زادت بشكل ملحوظ، ناس بتتصل بيك، تبعتلك رسالة، أو حتى تكلمك على واتساب وتقولك إنها من البنك… وكل اللي هما عايزينه منك شوية بيانات صغيرة.
بس الحقيقة؟.. الشوية دول ممكن يضيعوا تحويشة عمرك.
أهم حاجة لازم تبقى عارفها: مفيش بنك هيطلب منك الرقم السري، أو رقم الكارت كامل، أو الـ 3 أرقام اللي ورا الكارت، أو حتى كلمة السر اللي بتيجيلك في رسالة (OTP).
أي حد يطلب منك الحاجات دي، غالبًا نصاب، فلو حد كلمك وقالك إنه من البنك وطلب بياناتك، اقفل المكالمة فورًا، وكلم خدمة العملاء من الرقم الرسمي المكتوب على ضهر الكارت بتاعك.
ولو تواصل معاك برقم موبايل أو إيميل مشبوه، احتفظ بالبيانات دي وبلغ البنك بيها.
وخلي بالك جدًا: أوعى تشارك رقم الكارت، تاريخ الانتهاء، أو رمز الأمان اللي ورا الكارت مع أي حد.
ولو بتشتري أونلاين، كلمة السر اللي بتيجيلك في رسالة دي ليك إنت بس، متقولهاش لأي حد حتى لو قالك إنه موظف بنك.
وكمان خد بالك من خاصية التجديد التلقائي في تطبيقات الأفلام والمباريات والاشتراكات، لأنك كده بتدي إذن إن الفلوس تتخصم من غير ما ترجعلك كل مرة.
الأمان مش مسئولية البنك لوحده، ده دورك إنت كمان، حافظ على بياناتك، عشان فلوسك تفضل في أمان.
التعليقات