يا ترى إيه هو الجديد في ملف الغاز في مصر بعد الحرب الإيرانية الإسرائيلية، هل الحكومة بتحاول تعوض فكرة وقف استيراد الغاز من إسرائيل بدولة تانية، وإيه هي الدولة دي وامته تظهر بشاير التعاون؟
في الحقيقة، مصر دلوقتي عملت تعاون مع جولة جديدة عشان تعزز توافر الغاز للاستخدام المحلي، وبالفعل وزير البترول المصري المهندس كريم بدوي، عقد لقاء مهم مع وزير الطاقة القبرصي جورج باباناستاسيو، على هامش قمة “تحول الطاقة” اللي اتعملت في أثينا.
واللقاء ده، كان بيدور حوالين تنفيذ خطة ربط حقول الغاز القبرصية بمصر، وخصوصًا حقلي “كرونوس” و”أفروديت”، اللي فيهم احتياطيات كبيرة ممكن تضيف قيمة ضخمة للسوق المصري.
وبالفعل، حصلت اتفاقات، واتكلموا عن عن خطوط الأنابيب والمسح البحري لمسارات التوصيل والإجراءات البيئية والتنظيمية اللي لازم تتظبط بسرعة علشان المشروع يتحرك.
والحلو في الموضوع، إن كل طرف عارف أهمية التنسيق والتسريع، وكمان وزير الطاقة القبرصي بنفسه قال إن مصر عندها بنية تحتية قوية، قادرة تستقبل الغاز وتعيد تصديره، وده بيخلي المشروع مفيد لكل الأطراف.
أما بقى، وزير البترول المصري فأكد إن مصر ماشية بخطى واضحة علشان تبقى مركز إقليمي لتداول الطاقة، وده بيتم من خلال ربط الشبكات وتكامل البنية التحتية في المنطقة.
وأكد الوزير كمان، إن تنمية الحقول القبرصية هو بداية تعاون أكبر وأوسع، وده جزء من استراتيجية الدولة لتأمين مصادر متنوعة ومستقرة للطاق، وكمان خلق قيمة مضافة لشعوب المنطقة كلها.
واللقاء ده انتهى بتأكيد الجانبين على أهمية تكثيف الاجتماعات الفنية، ومتابعة التنفيذ أول بأول، وإنه خلال الشهور الجاية هيكون فيه اجتماعات عالية المستوى علشان يتابعوا كل جديد، ويوصلوا للنتائج بأسرع وقت ممكن.
والخلاصة هي إن مصر بتبني شراكة اقتصادية مهمة مع قبرص عشان نقدر نكون فق قلب خريطة الطاقة في المنطقة.
التعليقات