رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، تطورات جديدة في سوق الذهب، وتحرك محدود للدولار، واتفاقية مهمة مع الصين.
ونبدأ من سوق الصاغة.. اللي شهدت فيه أسعار الدهب النهارده ارتفاع جديد.. وسجل جرام عيار 21 سعر 4575 جنيه.
سعر جرام الدهب عيار 21 وصل لـ 4575 جنيه.. وده العيار اللي عليه الإقبال الأكبر في السوق المحلي.
أما عيار 24 فسعره النهارده بقى حوالي 5257.25 جنيه للجرام.. وده بيعتبر أغلى وأعلى عيار موجود في مصر.
وبالنسبة لعيار 18.. فسجل سعر 3942.75 جنيه للجرام
وعيار 14 كمان ارتفع وسجل حوالي 3066.75 جنيه للجرام
أما الجنيه الدهب فسعره النهارده وصل لـ 36800 جنيه.. وده طبعًا لأنه وزنه 8 جرام من عيار 21.
وطبعًا أسعار الدهب في مصر بتختلف من محل لمحل بسبب المصنعية.. وسعر المصنعية والدمغة في محلات الصاغة بيتراوح حاليًا بين 150 لـ 400 جنيه.. وده حسب نوع العيار وكمان حسب كل محافظة ومحلاتها.
ونروح دلوقتي على سوق صرف العملات الأجنبية.. اللي شهد ارتفاع بسيط في سعر الدولار قدام الجنيه.. حوالي قرشين كده في نص تعاملات النهاردة.
وسعر الدولار النهارده في البنك المركزي المصري
48.59 جنيه للشراء
48.72 جنيه للبيع
وفي بنك مصر:
48.67 جنيه للشراء
48.77 جنيه للبيع
ونفس الأسعار بالظبط في البنك الأهلي المصري:
48.67 جنيه للشراء
48.77 جنيه للبيع
وبرضو في البنك التجاري الدولي CIB:
48.67 جنيه للشراء
48.77 جنيه للبيع
وسعر الدولار بيعتبر مؤشر اقتصادي مهم بيعكس قيمة الجنيه قدام أهم عملة في العالم.. وسعره الرسمي في مصر بيتحدد من البنك المركزي حسب العرض والطلب في السوق.. وكمان بيأخد في الاعتبار السياسة الاقتصادية والتغيرات العالمية.
ونروح لوزارة البترول..
النهارده المهندس كريم بدوي وزير البترول والثروة المعدنية كان في إمارة دبي.. وعقد اجتماع مهم مع سونغ يو رئيس مجلس إدارة والرئيس التنفيذي لشركة “يونايتد إنرجي جروب” الصينية.. وكمان حضر الاجتماع المهندس كامل الصاوي الرئيس الإقليمي للشركة في أفريقيا والوفد المرافق.
الاجتماع ركز على إن الشركة الصينية مهتمة توسع استثماراتها جوه مصر.. وده بسبب المناخ الإيجابي اللي الدولة وفّرته للاستثمار.. وكمان بفضل نجاح الشراكة اللي بينهم وبين قطاع البترول المصري في العراق.. واللي شجعهم يفكروا في فرص تانية للتعاون مع مصر في السوق الإقليمي والعالمي.
وخلال اللقاء.. اتكلموا عن فرص التعاون في تجارة الطاقة.. علشان يزودوا التكامل التجاري ويوسّعوا وجودهم في الأسواق العالمية.. وده في إطار توجه مشترك علشان يعمقوا وجودهم الدولي ويرفعوا كفاءة سلاسل القيمة في قطاع الطاقة.
وخلال الاجتماع كمان.. الوزير شهد توقيع مذكرة تفاهم بين وزارة البترول والشركة الصينية UEG.. بهدف رسم إطار عام للتعاون في استكشاف فرص استثمارية في مجالات البترول والغاز سواء جوه مصر أو برّاها.. وكمان التفكير في التوسع في مشروعات الطاقة المتجددة وتداول الطاقة.
ونختم بالمهندس شريف الصياد.. رئيس المجلس التصديري للصناعات الهندسية.. واللي أعلن إن القطاع واصل أداءه الإيجابي خلال أول نص من سنة 2025.
قال إن صادرات القطاع سجلت نمو بنسبة 15% مقارنة بنفس الفترة من سنة 2024.. بإجمالي صادرات وصل لـ 3.1 مليار دولار لحد نهاية يونيو.. مقابل 2.7 مليار دولار في أول نص من السنة اللي فاتت.. ودي أرقام تاريخية عمرها ما اتحققت في 6 شهور قبل كده.
وبيّن كمان إن شهر يونيو لوحده شهد ارتفاع في الصادرات بنسبة 7%.. يعني سجلوا 475 مليون دولار.. مقابل 445 مليون في نفس الشهر من السنة اللي فاتت.. وده معناه إن القطاع لسه محافظ على الزخم بتاعه رغم كل التحديات.
وأضاف كمان إن في قطاعات فرعية ساهمت في النمو ده.. زي الكابلات.. ومكونات العربيات.. والصناعات الكهربائية والإلكترونية.. والأجهزة المنزلية.. ووسائل النقل.. لكن الأداء الاستثنائي كان من نصيب قطاع المعادن.. اللي نموه عدى 260%.. وده مؤشر قوي على تحسن تنافسية المنتجات المصرية في المجال ده.
التعليقات