التخطي إلى المحتوى

يا ترى ليه أسعار الدهب نزلت رغم إن الأوقية عالميا عليت، هل قي أسباب محلية ولا السوق العالمي هو اللي مضطرب، طب توقعات الأسعار رايحة على فين؟

في الساعات الأخيرة، حصل تراجع ملحوظ في أسعار الدهب في السوق المحلي، وده رغم إن الأوقية على مستوى العالم زادت شوية، وده بيخلي ناس كتير تسأل “هو ليه الدهب بيقل لما المفروض يغلى؟”.

ونقدر نقول، إن السبب الرئيسي هو إن سعر الدولار في مصر نزل شوية، وده خلا سعر الجرام يهبط رغم ارتفاع الأوقية، يعني ببساطة العلاقة هنا مش بس مرتبطة بالسوق العالمي، لأ كمان بتتأثر بسعر العملة المحلية، وكمان “عيار 21” سجل حوالي 4565 جنيه، يعني نزل حوالي 10 جنيه عن امبارح، وده استمرار لهبوط حصل من بداية الأسبوع بأكتر من 60 جنيه.

طيب وإيه الجديد؟
المفاجأة إن الفيدرالي الأمريكي قرر يثبت أسعار الفايدة تاني، ودي تعتبر المرة الخامسة في 2025.

وده مهم، لان أي نية لتخفيف السياسة النقدية من الفيدرالي معناها إن الدولار هيتأثر، وساعتها الدهب غالبا هيرجع يطلع تاني، لأنه بيبقى الملاذ الآمن وقت ضعف الدولار أو التوتر العالمي.

ومن ناحية تانية، فالعالم كله مرعوب من موضوع الرسوم الجمركية بين أمريكا وأوروبا، واللي ممكن يأثر على التجارة العالمية، وده لو استمر هيخلي ناس كتير ترجع تشتري دهب كنوع من التحوّط.

والأهم بقى، إن قي تقارير من شركات مالية كبيرة زي “فيدليتي إنترناشونال” بتقول إن في احتمال يوصل الدهب ل4000 دولار للأوقية في 2026، لو استمر الفيدرالي في خفض الفايدة، والدولار فضل ضعيف والبنوك المركزية كملت تشتري دهب بكميات كبيرة.

يعني باختصار، الدهب في مفترق طرق، يا إما يكمّل هبوط على المدى القصير لو الفيدرالي مسك على الفايدة، أو يرجع يطير لو بدأ يخفف السياسة النقدية.

والسوق المحلي عندنا في مصر، لسه تحت ضغط سعر الدولار، وكل يوم في متغيّرات جديدة، فاللي بيفكر يشتري أو يبيع، لازم يكون متابع لحظة بلحظة.

طب الدهب رايح فين؟
ده سؤال إجابته هتكون بعد بيان الفيدرالي، بس اللي متأكدين منه إن كل خطوة اقتصادية في العالم بتنعكس علينا في لحظتها، وسعر الجرام في جيبك بيتأثر بالمفاوضات اللي بتحصل في واشنطن وستوكهولم وبروكسل.


التعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *