يا ترى بتصدق كل اللي بتشوفه على السوشيال ميديا؟ طب لما تسمع إن الدولار هيوصل لـ 100 جنيه.. بتقول إيه؟ أو لما تلاقي حد بيشكك في العاصمة الإدارية ويقولك فشلت ومفيش حد ساكن فيها.. بتصدق؟ طب لما تلاقي إشاعات عن إفلاس مصر وبيع قناة السويس.. بتعديها؟ ولا بتسأل نفسك: مين ورا الكلام ده؟
الحقيقة فيه حرب ممنهجة على الاقتصاد المصري.. بس مش بالحروب التقليدية.. دي حرب إشاعات ومعنويات وأكاذيب متقنة.. واللي وراها نفس الجماعة اللي بقالها سنين بتحاول توقع البلد من أول يوم خرجت فيه من الحكم.. الإخوان وأهل الشر.
الناس دي مش بتشتغل عشوائي.. بالعكس.. دي شغالة بدقة وتنظيم هدفه الأساسي إنها تضرب ثقة الناس في الاقتصاد.. يطلعوا إشاعة .. ينشروها على السوشيال الميديا.. وبعد كده يلاقوا ناس بتعيد النشر بدون تحقق.. ولما الإشاعة تنتشر.. يحصل بلبلة.. والسوق يتأثر.. والأسعار تتحرك.. والمواطن البسيط هو اللي بيتخض.
تعالى نرجع ورا شوية ونسأل.. إيه أكتر الإشاعات اللي حاولت تضرب الاقتصاد المصري الفترة اللي فاتت؟
أول إشاعة تقيلة.. كانت إن الدولار هيكسر حاجز الـ100 جنيه .. وده طلع في وقت الناس كلها كانت بترقب السوق.. وبدأ الانتشار على قنواتهم ومنصاتهم الممولة.. والناس بدأت تتكلم.. لكن في الحقيقة.. السعر الرسمي فضل محافظ على توازنه.. وحتى السوق السودا اختفت تماما بعد قرارات الدولة الأخيرة.
والمؤسسات الدولية زي البنك الدولي وصندوق النقد.. أكدوا إن الإصلاحات المصرية ماشية في الاتجاه الصحيح.
الإشاعة التانية.. واللي بتتكرر كل فترة هي إن العاصمة الإدارية الجديدة فاشلة ومحدش رايح يسكن فيها.. وفي نفس التوقيت.. تلاقي آلاف الموظفين بينتقلوا للمقار الجديدة.. وتلاقي البنية التحتية هناك بتشتغل بكفاءة.. مدن ذكية.. خدمات رقمية.. ومشروعات شغالة في الحي الحكومي والبنوك والمقرات الدولية.. والهدف ببساطة هو تشويه مشروع قومي ضخم.. بيمثل واجهة جديدة لمصر.
ومن نفس الخط.. طلعوا إشاعة إن الدولة باعت قناة السويس.. وده كدب متكرر.. تم نفيه رسميًا أكتر من مرة.. والناس اللي مش فاهمة بيتلعب بيها.. واللي وراها هدفهم يضربوا رموز السيادة الوطنية قبل الاقتصاد.
حتى المشروعات الاستثمارية الكبيرة.. ما سلمتش.. قالك مفيش استثمار جاي لمصر.. وفي نفس التوقيت كانت تقارير المؤسسات الدولية بتقول إن مصر من أكتر الدول الجاذبة للاستثمار في البنية التحتية والطاقة.. وشركات عملاقة بتيجي تفتح مصانعها وتوسع نشاطها هنا.
طيب ليه بيعملوا كده؟
لأن الإشاعة سلاح رخيص وسهل.. والهدف مش إن الناس تصدق.. الهدف هو إن الناس تشك.. والشك ده بيخلي المواطن يتردد.. والمستثمر يخاف.. والسوق يهتز.
لكن الدولة بدأت ترد بشكل احترافي.. مش بس بتكذّب الشائعة.. لأ.. بقت بتوضح بالأرقام والتقارير الدولية.. بقى في وعي أكبر.. وبقى المواطن نفسه عنده رادار يفرّق بين المعلومة الصح والإشاعة الموجهة.
الأكيد ان فيه شغل كتير بيتعمل عشان البلد دي تقوم على رجليها اقتصادياً.. ومهما حاولوا يشككوا أو يضللوا.. الواقع دايمًا بيرد بأقوى من الكلامفـ لو سمعت إشاعة تانية عن الدولار أو العاصمة أو أي مشروع قومي.
اسأل نفسك هو الكلام ده مبني على أرقام.. ولا جاي من صفحات صفرا بتشتغل ضدك وإنت مش واخد بالك.
التعليقات