هل ممكن السياحة في مصر توصل لـ 24 مليار دولارفي السنة ؟ طب إزاي ده هيحصل؟ وإيه اللي بيخلي السياح حالياً يسيبوا أوروبا ويجوا يقضوا إجازاتهم عندنا؟ وهل فعلاً إشغالات الفنادق في الغردقة ومرسى علم بقت توصل لـ 95%؟.. ركز معايا.. عشان الأرقام الجاية هتخليك تبص على السياحة المصرية بنظرة مختلفة تماما.
مصر دلوقتي بتشتغل على هدف طموح جداً.. إنها توصل بإيراداتها السياحية لـ 18.3 مليار دولار في السنة المالية 2025-2026. ده بزيادة 9.5% عن السنة اللي فاتت اللي كانت الإيرادات فيها حوالي 16.7 مليار دولار. والمثير أكتر إن البلد بتستهدف إنها توصل لـ 24 مليار دولار إيرادات سياحية مع نهاية 2028-2029.
يعني باختصار.. فيه خطة طويلة المدى.. وبتتطبق على الأرض بجد. وده باين في أرقام النصف الأول من 2025.. اللي مصر قدرت فيه تستقبل حوالي 8.7 مليون سائح. ده نمو 24% عن نفس الفترة السنة اللي فاتت. والطموح هنا كبير.. عايزين نختم السنة بـ 17 مليون سائح.. بدل 15.7 مليون اللي كانوا في 2024.
طيب.. السياح دول بيصرفوا قد إيه؟
في السنة اللي فاتت متوسط الإنفاق السياحي كان 97 دولار في الليلة الواحدة. السنة دي فيه توقع إنه يتخطى 105 دولار. وبالنسبة لعدد الليالي.. السياح قضوا أكتر من 172 مليون ليلة سياحية السنة اللي فاتت.. والمتوسط لكل سائح كان حوالي 10.5 ليلة. الخطة المستقبلية؟ الوصول لـ 240 مليون ليلة خلال أربع سنين.. ومتوسط إقامة يوصل لـ 11 ليلة.
يعني مش بس عدد السياح بيزيد.. لكن كمان كل واحد فيهم بيقعد أكتر وبيصرف أكتر.
وإيه السبب في الطفرة دي؟
فيه شغل جامد جداً حصل على محورين .. الأول.. الترويج والتسويق للمقاصد السياحية المصرية بشكل قوي ومركز… والتاني .. التوسع في الخدمات.. من حيث الكم والجودة.. يعني فنادق أكتر.. ومستوى خدمة أعلى.
ووفقا للمعلومات المتاحة.. مصر أضافت أكتر من 5500 غرفة فندقية في أول 6 شهور من 2025 بس. وبقت الطاقة الفندقية عندنا بتوصل لـ 229 ألف غرفة. والمفاجأة.. إن حوالي ثلثين الطاقة دي متركزين في البحر الأحمر وجنوب سيناء. يعني بالبلدي.. شرم الشيخ والغردقة عاملين شغل جامد.
في شرم الشيخ.. نسبة الإشغال دلوقتي بتتجاوز 75%.. وفي بعض الفنادق وصلت لـ 90%. السياح بييجوا من أوروبا الشرقية.. زي بولندا والتشيك وسلوفاكيا وسلوفينيا. وكمان فيه إقبال كبير من العرب.. ومن الطليان اللي بيمثلوا نسبة عالية جداً من الأجانب هناك.
أما مرسى علم.. فالوضع فيها بقى خرافي. الإشغالات السياحية هناك بتوصل لـ 95%. وحركة الطيران زادت بنسبة 22% الشهر ده.. وعدد الرحلات الأسبوعية عدى 118 رحلة. كل ده بيأثر بشكل مباشر على أسعار الغرف اللي ارتفعت بنسبة 10 لـ 15% على الأقل.
باختصار.. إحنا مش بنتكلم عن مجرد تحسن في السياحة.. إحنا بنتكلم عن تغيير شامل في شكل وصورة القطاع السياحي في مصر. أرقام.. وخطط.. واستثمارات حقيقية.. بتقول إن البلد دي ماشية على الطريق الصح.
لو مصر قدرت تحافظ على الزخم ده.. وزودت استثماراتها في البنية التحتية والتسويق.. مفيش سبب يمنعنا نوصل للـ 30 مليون سائح اللي بنستهدفهم في 2030.
التعليقات