يا ترى الإخوان بيجيبوا كل الفلوس اللي معاهم دي منين؟ إزاي تنظيم بيشتغل من ورا الستار.. يقدر يبني إمبراطورية مالية تمتد من أوروبا لحد ماليزيا؟ وإزاي الفلوس اللي بتدخل تحت ستار التبرعات.. وبتخرج تاني وهي نضيفة؟ وفين بترووح كل المليارات اللي بيتحركوا بيها باسم العمل الخيري؟
كل اللى بيتقال عن اموال الاخوان مش مجرد تساؤلات.. دي أسرار ابتدت تتكشف على مستوى دولي.. تقارير دولية كتير من منظمات لمكافحة غسيل الأموال.. ومراكز أبحاث أوروبية.. كشفت تورط قيادات كبيرة في الجماعة في عمليات غسيل أموال عابرة للحدود.
الفلوس بتخرج من جمعيات ومؤسسات ظاهرها خير.. وباطنها شبكة تمويل ضخمة.. يعني بتدخل من أبواب شرعية.. وتخرج تاني بعد ما تتغسل في شركات واجهة.. أو استثمارات مشبوهة في أوروبا وتركيا وماليزيا.
طب إزاي التنظيم قدر يتفادى الملاحقة القانونية؟
الموضوع أبسط مما تتخيل.. يعملولك مؤسسة خيرية باسم فخم في لندن أو برلين أو جنيف.. ويجمعوا تبرعات على حسها بالملايين تحت شعارات حقوق الإنسان أو دعم اللاجئين أو تنمية المجتمعات.. وفي الحقيقة.. المؤسسة دي مرتبطة بشكل غير مباشر بقيادات إخوانية هربانة من مصر.. كل ما يتزنقوا.. ينقلوا النشاط باسم جديد.. أو يغيروا مجلس الإدارة.. ويكملوا بنفس الطريقة.
واحدة من الطرق اللي اتكشفت في التقارير الدولية.. إنهم بيستخدموا حاجة اسمها التحويلات المتكررة صغيرة القيمة.. يعني يبعدوا عن الشبهات الكبيرة.. ويحولوا مبالغ صغيرة بأسماء مختلفة.. بس على مدار الشهر يوصلوا مليون أو اتنين.. غير كده.. عندهم شركات استيراد وتصدير وهمية.. وبيفتحوا حسابات بنكية في دول عندها تساهل في الرقابة البنكية زي قبرص.. أو بعض دول شرق آسيا.. أو حتى شركات أوفشور في جزر الكاريبي.
التقارير فضحت كمان إن في فلوس بتدخل في تمويل قنوات معادية للدولة.. ومنصات إعلامية بتهدف لهدم الاستقرار ونشر الشائعات.. يعني ببساطة.. جزء كبير من تمويل الحرب النفسية والإعلامية اللي بتتعمل على مصر.. جاي من الفلوس اللي بتتغسل برا.. فلوس بيتم تحريكها عن طريق شبكات معقدة.. بس كلها مرتبطة بجذر واحد.. الإخوان.
وأخطر حاجة بقى.. إن التنظيم عنده خطة واضحة لتوظيف الفلوس دي في استثمارات طويلة المدى زي شركات عقارية في تركيا.. تجارة دهب في ماليزيا.. مطاعم ومحلات في أوروبا.. بتشكل مصدر دخل ثابت ومستمر.. وبكده.. يفضلوا دايمًا ممولين.. ومجهزين لأي تحرك في أي وقت.
بس الجديد إن مؤسسات دولية بدأت تشتغل على رصد وتتبع الشبكات دي.. وفيه أسماء ظهرت في القوائم السوداء.. وفيه أصول تم تجميدها.. وحسابات اتمسكت.. يعني الدائرة بتضيق.. والأقنعة بتقع.. والدول نفسها بقت واعية لحجم الشبكة اللي اشتغلت على مدار سنين,
التعليقات