منصات بانكير قدمت النهاردة عدد من التقارير والتحليلات الخاصة في الشأن الاقتصادي والمالي المصري.. والبداية بتقرير عن أول مشروع للنقل الداخلي في العلمين الجديدة.
قال التقرير، إن الحكاية بدأت مع أول مشروع للنقل الداخلي جوه مدينة العلمين الجديدة، المشروع ده معمول عشان يسهل على الناس تنقلاتهم اليومية جوه المدينة، سواء رايح الجامعة، نازل البحر، أو حتى خارج من بيتك تروح مشوار.
وشرح التقرير، أن المشروع عبارة عن أتوبيسات كهربا حديثة، ماشية بمواعيد منتظمة، ومحطات موزعة بشكل ذكي على أهم الأماكن الحيوية جوه المدينة.. يعني لو إنت ساكن في وحدة سكنية في منطقة الأبراج، وعايز تروح جامعة العلمين، هتلاقي الأتوبيس واقفلك في المعاد، وياخدك ويوصلك في راحة وتكييف وشحن موبايل كمان.
واستعرض تقرير بانكير، الخطوط الثلاثة اللي تم تشغيلها وهي خط الإسكان – الجامعات، وده معمول مخصوص عشان يخدم الطلبة وأعضاء هيئة التدريس، يعني بدل ما الطلبة يفضلوا يدوروا على مواصلات أو يمشوا مسافات طويلة.. وكمان اشتغل خط الإسكان – الشاطئ.. والخط ده هيوصلك من بيتك لحد الشواطئ العامة والخاصة بسهولة، وده هيساعد كمان على تنشيط السياحة الداخلية.. أمام بقى الخط التالت فهو خط الإسكان – المحاور الساحلية، وده بيربط مناطق السكن بالمحاور الرئيسية والمناطق التجارية والترفيهية، يعني تقدر تروح أي مكان جوه المدينة سواء مطاعم، كافيهات، خدمات، أو حتى تمشي على الكورنيش.. من غير ما تتعذب في الطريق.
منصات بانكير قدمت تقرير مختلف النهاردة عن السردية الوطنية للتنمية الاقتصادية وتأثيرها على الاقتصاد المصري.
كشف تقرير بانكير، أن الحكومة بتلجا لتنفيذ افكار جديدة لتغيير شكل الاقتصاد وبيكون الهدف الأساسي منها هو زيادة إيرادات الدولة المصرية في الناتج القومي المصري، وجذب استثمارات جديدة للاقتصاد المصري، وتنويع مصادر الدخل الدولاري من الخارج لمصر.
وأكد التقرير، أن الفترة الحالية الحكومة ممثلة في وزارة التخطيط بتستعد لاطلاق السردية الوطنية للتنمية الاقتصادية ودي بتعد وثيقة وإطار مرجعي وبرنامج عملي للنموذج الاقتصادي الجديد اللي الدولة بتسعي لتبنيه؛ وده بيحصل من خلال توحيد مختلف السياسات والاستراتيجيات والمستهدفات؛ علشان تكون في النهاية بمثابة منصة موحدة للوثائق والاستراتيجيات اللي بتحكم توجهات الحكومة وعملها في الوقت الراهن.
وأوضح التقرير، أنه خلال وقت قريب قوي الحكومة هتطلق السردية الوطنية واللي هتكون خارطة طريق لمحاور التنمية الاقتصادية في السنين اللي جاية.. وده لوضع إطار مرجعي وبرنامج عملي يأخذ في الاعتبار المتغيرات الاقتصادية على الصعيدين الإقليمي والدولي، واستغلال الإمكانات الكبيرة للاقتصاد المصري؛ لتحقيق تنمية اقتصادية شاملة ومستدامة.
وأشار تقرير بانكير إلى أن السرية الوطنية للتنمية الاقتصادية بتتضمن 5 محاور رئيسية تتعلق بتعزيز استقرار الاقتصاد الكلي، والاستثمار الأجنبي المباشر، والتنمية الصناعية والتجارة الخارجية، وكفاءة ومرونة سوق العمل، والتخطيط الإقليمي لدفع التنمية الاقتصادية، وبتنطلق من برنامج الإصلاح الاقتصادي والهيكلي، اللي نفذته الحكومة في مارس 2024 وأسهم في خروج الاقتصاد المصري من التحديات لاستغلال الإمكانات والفرص الكبيرة المتاحة في مصر، والميزة التنافسية اللي بيتمتع بها الاقتصاد المصري في مختلف القطاعات.
وحدة أبحاث بانكير قدمت تقرير خاص النهاردة عن خطوات الحكومة لتسريع صرف شرائح صندوق النقد.
أكد التقرير، أن الحكومة في الفترة الحالية قدامها تحدي صعب وهو إنجاز ملف الطروحات الحكومية خصوصا أن الملف ده كان السبب في قرار صندوق النقد الدولي بتأخير صرف الشريحة الخامسة من قرض الـ8 مليار دولار واللي مصر حصلت علي موافقته في مارس 2024 وصرفت منه 4 شرائح حتي الآن كان آخرها الشريحة الرابعة اللي صرفها الحكومة من كام شهر واللي وصلت قيمتها لـ1.2 مليار دولار.
وأوضح تقرير بانكير، أن خطوات الحكومة لتسريع صرف شرائح صندوق النقد، هو أنها بدأت مناقشات مع الاستشاري الدولي اللي متعاقدين معاه علشان يناقشوا إجراءات الطرح للشركات المملوكة للقطاع العام في البورصة المصرية، واللي هتشمل عدد من الشركات المملوكة للقوات المسلحة زي شركة صافي وشركة وطنية، وغيرها من الشركات اللي هتطرح قدام القطاع الخاص.
وكشف التقرير، أن إجراءات الطرح الجديدة هتتضمن كمان دخول المطارات في إجراءات الطرح، واللي هتبدا بطرح مطار الغردقة قدام القطاع الخاص وعلي فكرة مصر مش اول مرة تطرح مطار للشراكة قدام القطاع الخاص لا ده احنا عندنا تجربة مماثلة في الشراكة مع مطار مرسي علم واللي تشغيله بيتم بالشراكة بين القطاعين العام والخاص.
التعليقات