يا ترى إيه قصة الحزمة الاجتماعية الجديدة اللي الحكومة ناوية تعلن عنها قريب، وامتى هتوصل للناس، ولو إنت من الفئات الأولى بالرعاية، هل الحزمة دي هتفيدك؟
في الحقيقة، في أخبار كتير طلعت بتقول ان الحكومة بتجهز لإطلاق حزمة اجتماعية استثنائية جديدة قريب، عشان تدعم الناس اللي محتاجة فعلا، وتخفيف الضغط عنهم في وقت الأسعار فيه مش سهلة.
لكن الدكتور أحمد كجوك، وزير المالية، قال ان الكلام ده سابق لاوانه وان لسه شوية على تطبيق حزمة اجتماعية جديدة، خاصة وان في حزمة تانية تم الإعلان عنها وتطبيقها في شهر رمضان اللي فات.
وفي مصادر في وزارة المالية، طلعت كلام انهم شغالين على حزمة جديدة قوية، بتستهدف تمكين الفئات المهمشة، ومساعدة الفئات الأولى بالرعاية، وكمان دعم القطاعات الاقتصادية الحيوية.
وده مش أول دعم، دي كمان المرحلة التانية من مبادرة التيسيرات الضريبية، اللي الحكومة بدأتها قبل كده تحت عنوان “نقطة ومن أول السطر”، واللي كانت موجهة لدعم المشروعات الصغيرة والمتوسطة ومتناهية الصغر..
وكمان، الوزارة قدرت ترفع دعمها للقطاعات الاستراتيجية 3 مرات، زي دعم الصادرات والبترول والمشروعات الصغيرة، وتمكين المرأة ، وغيرهم، يعني من الآخر، الحكومة بتركز حاليا على توازن صعب جدا وهو دعم الناس اللي محتاجة وفي نفس الوقت تهيئة بيئة جاذبة للاستثمار والنمو الاقتصادي واللي بيأكد ده، إن وزير المالية قال ان كل المؤشرات الاقتصادية والمالية مشجعة جدا، وإحنا متفائلين بالمستقبل، وساعين لخفض الدين وزيادة النمو بقيادة القطاع الخاص.
كمان، الحكومة مش بس بتشتغل على دعم الفئات الاجتماعية، لأ ده في توجه واضح لدعم التحول الأخضر ومبادرات البيئة، وده مهم جدًا في المرحلة الجاية.
والسؤال اللي بيفرض نفسه، امته هيتم تطبيق الحزمة دي، وهل هتكون كافية فعلا لتخفيف العبء عن المواطنين؟
في الحقيقة لسه بدري على التطبيق زي ما قال وزير المالية، ولكن في مصادر بتقول ان ممكن تكون في رمضان الجاي، أما بقى قصة انها تكون كافية لدعم المواطنين ولا لأ فالأيام الجاية هتكشف، لكن اللي واضح إن فيه نية صادقة لتقديم دعم حقيقي ومستدام مش مجرد مساعدات مؤقتة.
التعليقات