الحكومة رسمت خطة جديدة لاكتشاف الذهب وأنها تكون الدولة الأكبر في العالم في إنتاج الذهب .. ياتري ده هيتحقق ازاي وآية خطة الحكومة لزيادة اكتشافات الذهب.
الحكومة في الفترة الرئاسية الجديدة رسمت خطط أنها تعظم إيرادات مصر من كل القطاعات واحدة من القطاعات المهمة اللي مستهدف زيادة الإيرادات منها هيا قطاع الذهب والتنقيب واكتشاف مناجم الذهب الجديدة، وطبعا علي أول القائمة منجم السكري واللي بيعد واحد من اهم وأكبر مناجم الذهب.
طيب اية حكاية منجم السكري دي وازاي الحكومة هتطور عمليات الكشف عن الذهب فيه؟.
منجم السكري ده واحد من أكبر وأهم المناجم اللي بيتم استخراج الذهب منها علي مستوي العالم، وده موجود في أعماق صحراء مصر الشرقية، وتحديدًا في منطقة جبل السكري بالقرب من مدينة مرسى علم، الحكومة بدأت الإنتاج الفعلي منه في 2010، وبيعد من أكبر عشر مناجم ذهب في العالم من حيث الاحتياطي.
مؤخراً الحكومة حطت خطة لزيادة وتطوير عمليات الإنتاج من منجم السكري، وده بيحصل من خلال زيادة عمليات الاستكشاف في محيط المنجم، واعتماد تقنيات حديثة في التنقيب الجيولوجي وتشجيع الشركات العالمية والمحلية على الدخول في مزايدات جديدة للتنقيب، خصوصا بعد نجاح الجولة الأخيرة واللي كان فيها اقبال غير مسبوق للشركات اللي عايزة تدخل تشارك في عمليات التنقيب، ده غير الجهود اللي بتقوم بيها الحكومة لتطوير البنية التحتية الداعمة لقطاع التعدين زي الطرق والموانئ ومحطات الطاقة، بالإضافة لجهود تحسين بيئة الاستثمار من خلال إصدار قانون الثروة المعدنية الجديد واللي هيمنح المستثمرين مزيد من الحوافز والشفافية.
التقديرات الرسمية بتأكد أن احتياطي منجم السكري وحده بيقدر بأكثر من 12 مليون أوقية ذهب، بقيمة هتتجاوز 20 مليار دولار بأسعار السوق الحالية، وفي الفترة اللي فاتت عائدات الاكتشافات الاخيرة صادرات الذهب من منجم السكري وصلت ل 1.2 مليار دولار في 2024، والرقم ده فتح شهية الحكومة علي وضع خطط للتوسع في تطوير عمليات التنقيب وده خطة جديدة ضمن خطوات تحويل مصر لمركز إقليمي لصناعة التعدين وده بيحصل من التوسع في الإنتاج وكمان دخول كبريات الشركات العالمية في مجالات المشغولات والتصنيع .
التعليقات