أخبار لايت: البنك المركزي يقرر العودة إلى الحد الأقصى السابق للسحب.. شوف حدود السحب المتاحة

يا ترى ليه البنك المركزي قرر يرجع حدود السحب تاني، وإيه الحد الجديد اللي هيشتغل من النهاردة، وتعمل ايه لو عندك حساب في بنك أو بتسحب مبالغ كبيرة؟

من ساعات، البنك المركزي المصري أعلن إنه رجع الحد الأقصى للسحب النقدي من فروع البنوك ل 250 ألف جنيه يوميا، وده بعد ما كان رفعه مؤقتا ل500 ألف جنيه يوم 8 يوليو اللي فات، بس ده كان وضع استثنائي ولس فترة مؤقتة.

طيب ليه رجعوه تاني؟
المركزي بيقول، إن الخطوة دي بتيجي ضمن خطته لضبط السوق وتنظيم السيولة النقدية، وده مهم جدا علشان يحافظ على استقرار الجهاز المصرفي، خاصة بعد ما شافوا إن الوضع رجع طبيعي بعد أيام من الزيادة المؤقتة.

طب إيه تأثير القرار ده على الناس؟
القرار مش هيأثر على الناس العاديين اللي سحبهم اليومي قليل، لكن لو انت صاحب شركة، أو بتتعامل بكاش كبير، أكيد هتحس بالفرق وهتحتاج تنظم تعاملاتك بطريقة مختلفة علشان تلتزم بالحد الجديد.

والقرار ده مش معناه إن في أزمة سيولة، لا خالص، ده البنك المركزي وضح إن دي مش أزمة، بالعكس القرار هدفه تنظيم التعاملات، مش تقييدها، وده لانالمركزي دايما بيراجع قراراته حسب تطورات السوق، وده طبيعي في أي اقتصاد.

أما بقى لو حضرتك رجا أعمال ومحتاج تسحب أكتر، وعندك أسباب واضحة وموثقة، فتقدر تتواصل مع البنك بتاعك، وفي حالات استثنائية ممكن يتعملك استثناء حسب نوع العملية اللي بتسحب علشانها، لكن في المطلق الحد اليومي هو 250 ألف جنيه من داخل الفروع.

طب والموقف من ماكينات الصراف الآلي atm؟ 
لحد دلوقتي، القرار بيخص السحب من داخل الفروع فقط، لكن غالبا الحد من ال atm هيكون أقل حسب كل بنك، وده معروف من زمان، يعني مش جديد. الجديد هو السقف من الفروع اللي رجع زي الأول.

والخلاصة، عي ان البنك المركزي بيرجع الأمور لطبيعتها بعد ما رفع الحد مؤقتا، وده جزء من خطته لضبط السيولة وتنظيم الكاش في السوق، والحد اليومي لسحب الفلوس من البنوك بقى 250 ألف جنيه، وده مش معناه إن في أزمة، بالعكس معناه إن في رقابة وتوازن في إدارة السيولة.