هو ليه في 19 شركة مصرية قرروا يشاركوا في مؤتمر استثمار في دولة أفريقية زي زامبيا، ايه هي المكاسب الاقتصادية اللي ممكن ترجع على مصر من المشاركة دي؟
في الحقيقة، في الفترة من 16 ل18 يوليو الحالي، زامبيا هتستضيف مؤتمر استثمار دولي مهم جدا، اسمه ZIIC، ودي أول مرة المؤتمر يتعمل برعاية مباشرة من رئيس زامبيا نفسه، وده معناه إن البلد ناوية تفتح أبوابها للاستثمار بكل قوة.
ومن هنا، جه دور مصر، فجمعية رجال الأعمال المصريين الأفارقة، برئاسة الدكتور يسري الشرقاوي، قررت تشارك بوفد ضخم فيه 19 شركة مصرية من قطاعات مختلفة، زي مقاولات كبرى وأجهزة كهربائية ومنزلية وتجهيز ملاعب وطاقة وتعدين ومصانع تجهيز مستشفيات، وأهمهم كمان شركات أدوية ومستلزمات طبية، يعني وفد تقيل داخل بكل قوة.
طيب ليه زامبيا؟
لأن ببساطة، زامبيا دلوقتي بقت مركز اقتصادي واعد في أفريقيا، وبتعتبر بوابة للوصول لأسواق كتير في الجنوب والشرق الأفريقي، ده غير ان الدولة عندها تشريعات محفزة للاستثمار وبنية تحتية بتتطور بسرعة.
فوق كل ده، المؤتمر ده بيشارك فيه أكتر من 1000 شخصية من كبار المستثمرين وصناع القرار من 25 دولة، يعني فرصة ذهبية لتظبيط العلاقات وتوقيع صفقات وفتح أسواق جديدة.
وعشان الزيارة تكون فعالة، السفيرة المصرية في زامبيا ميادة عصام، كانت من أوائل الناس اللي نسقت مع الجانب الزامبي، بالتعاون مع المكتب التجاري المصري، واللي حرصوا على إن كل حاجة تبقى مترتبة بدقة.
حتى الجمعية عملت مائدة مستديرة في القاهرة من كام يوم، ودعت فيها السفير الزامبي وأعضاء السفارة، وكل الشركات المصرية المشاركة عشان يظبطوا كل تفاصيل الزيارة والاجتماعات اللي هتتعمل مع الوزراء والمستثمرين الزامبيين.
طيب المكاسب؟
المكاسب هي فتح أسواق جديدة للشركات المصرية وخاصة في مجالات مهمة زي الصحة والطاقة والبنية التحتية، وده بجانب فرص تصدير أكبر للمنتجات المصرية، وده معناه شغل أكتر وفرص عمل جوه مصر، وكمان تطبيق فعلي لتوجهات الدولة المصرية اللي بتركز على توسيع التعاون مع أفريقيا، وده اتأكد لما رئيس زامبيا زار مصر في فبراير اللي فات.
وفي النهاية، المشاركة دي مش مجرد “تمثيل شكلي او شرفي، لأ دي خطوة مدروسة لبناء وجود اقتصادي مصري في عمق أفريقيا.
والخلاصة، هي ان المشاركة المصرية في مؤتمر زامبيا مش صدفة، دي تحرك استراتيجي ذكي عشان نوسع السوق ونصدر أكتر ونقوي علاقتنا الاقتصادية بالقارة السمراء، وزي ما الدكتور الشرقاوي قال “اللي مش هيكون موجود في أفريقيا النهارده، مش هيلاقي مكان بكرة”.
التعليقات