دلوقتي تقدر تطلع بطاقة تموين من غير تعب ولا لف كتير، وده اللي عملته الدولة للفئات المستحقة، بس يا ترى إيه الأوراق المطلوبة؟.. وإزاي تقدر تطلعها بخطوات سهلة وبسيطة؟.
لو نفسك تطلع بطاقة تموين جديدة في 2025 ومش عارف تبدأ منين، تعالى أقولك الموضوع ماشي إزاي خطوة بخطوة، وده من غير لف كتير.
ناس كتير بتسأل كل يوم عن الخطوات والشروط، وبالمختصر كده، الدولة بتسهل الموضوع علشان توصل الدعم فعلاً لمستحقيه، وتخفف الحمل عن الناس اللي دخلها بسيط.
طيب مين ليه حق يطلع بطاقة تموين؟
وزارة التموين حددت شوية شروط لازم تتوفر، في المواطن اللي محتاج يعمل بطاقة تموين، واللي أول حاجة فيها أنه لازم يكون من الفئات المستحقة للدعم، زي محدودي الدخل واللي ظروفهم صعبة، وماينفعش يكون عندك أو عند حد من أسرتك بطاقة تموين تانية.
كمان من ضمن الشروط، أنك لازم تقدم ورق يثبت إنك فعلا تستحق الدعم، زي شهادة الدخل أو ورقة من الشؤون الاجتماعية، ده غير بطاقة الرقم القومي بتاعتك، وبطاقات باقي أفراد الأسرة ولازم تكون سارية، ولو مش موجود بنفسك لازم يكون فيه وكيل بيقدم الطلب عنك، بس المهم يكون من قريبك من الدرجة الأولى أو معاه توكيل منك.
طيب إيه هي الأوراق المطلوبة؟
صورة بطاقة الرقم القومي ليك ولزوجتك والمهم تكون سارية، ده غير شهادات ميلاد الأولاد، ودول لو أقل من 18 سنة.
ولازم كمان تثبت إنك تستحق الدعم، زي مفردات مرتب أو شهادة من الشؤون.
وأنت رايح كمان لازم تاخد معاك إيصال مرافق حديث “كهربا، ميّه، أو غاز، ولو حالتك خاصة، زي مطلق أو منفصل، يبقى محتاج قسيمة طلاق أو حكم نفقة أو ورقة خصم.
طب لو عايز تقدم أونلاين من غير ما تروح مكتب التموين؟
بخطوات سهلة، تقدر تدخل موقع بوابة مصر الرقمية وتعمل الخطوات دي.
أول حاجة بتختار خدمة إصدار بطاقة تموين جديدة، وتملى البيانات المطلوبة صح: الاسم الرباعي، الرقم القومي، رقم الموبايل، العنوان، المحافظة، الإدارة التموينية ولازم تصورهم بجودجة كويسة وتحط كل الورق ده في ملف “بي دي إف”، وفي الآخر تراجع كويس وبعد كده تبعت الطلب.
طيب البطاقة بتطلع بعد قد إيه؟
لو كل حاجة تمام، الطلب بيتراجع، ولو اتوافق عليه، البطاقة بتكون جاهزة خلال من أسبوعين لـ 3 أسابيع، وهيجيلك رسالة تروح تستلمها من مكتب التموين أو من البريد.
التعليقات