يا ترى إيه اللي بيحصل في الكواليس؟ وايه الصفقة الكبرى اللى بيتم التحضير ليها بين مصر وقطر؟ وهل إحنا على أعتاب صفقة اقتصادية ضخمة تانية تقلب موازين سوق الصرف في مصر بعد صفقة رأس الحكمة؟ وايه التأثير المتوقع للصفقة على سعر الدولار والاحتياطي النقدي فى البنك المركزي؟
مصر وقطر.. حبايب من تاني.. بس المرة دي الحكاية أكبر بكتير من مجرد كلام في الفضائيات.. فيه صفقة بتطبخ على نار هادية.. صفقة ممكن تكون هي طوق النجاة اللي الاقتصاد المصري مستنيه في الأوقات الصعبة دي.. تعالوا نفهم الحكاية من الأول.
مصدر موثوق قال إن قطر بتفاوض دلوقتي على صفقة استثمارية ضخمة.. حوالي 3.5 مليار دولار هتتضخ في مشروع سياحي عملاق على ساحل البحر المتوسط في مصر.. الصفقة دي لو تمت.. هتكون أحدث دعم خليجي للاقتصاد المصري اللي بيعاني شوية بسبب الأوضاع الإقليمية اللي كلنا عارفينها.
المفاوضات دي سرية جداً.. بس المعلومة المتاحة بتقول إن الصفقة دي هتكون لتطوير أراضي في واحدة من أهم وأجمل مناطق العطلات في مصر.. وممكن تتوقع قبل نهاية 2025.. لسه ما تحددش بالظبط موقع الأرض دي ولا مساحتها.. بس الأكيد إنها هتكون حتة جامدة جدا.
ليه الصفقة دي مهمة أوي دلوقتي؟
بصراحة.. توقيت الصفقة دي حساس جداً ومهم أوي لمصر.. إحنا عارفين إن الصراع اللي داير بين إسرائيل وإيران بيزود الضغط على القاهرة.. وده بيخلي تأمين استثمارات أجنبية مستمرة حاجة حيوية جداً للاقتصاد المصري..
شفنا إزاي سندات مصر الدولارية اتراجعت.. والجنيه سعره نزل.. والبورصة المصرية سجلت أسوأ هبوط ليها من 5 سنين بعد الضربة الجوية الإسرائيلية على إيران الأسبوع اللي فات.. ده غير كمان إن تخفيضات إمدادات الغاز من إسرائيل أجبرت مصر إنها توقف الضخ لبعض المصانع.. وتستخدم الديزل في محطات الكهرباء عشان تتجنب انقطاع التيار اللي شفناه في الصيف اللي فات.. يعني الوضع كان محتاج نفَس جديد..
تأثير الصفقة دي على الدولار والاحتياطي النقدي؟
طبعاً.. دخول 3.5 مليار دولار سيولة جديدة للبلد هيكون ليه تأثير إيجابي كبير جداً على سوق صرف الدولار.. لما الدولار يكون متوفر في السوق.. قيمته بتقل قدام الجنيه المصري.. وده ممكن يؤدي لانخفاض في سعر الدولار.. وده اللي المواطن بيحس بيه بشكل مباشر في أسعار السلع.
أما بالنسبة للاحتياطي النقدي في البنك المركزي.. فدي سيولة جديدة هتضاف ليه.. وده هيزود الاحتياطي.. وهيدي للبنك المركزي قدرة أكبر على إدارة السياسة النقدية.. ويقدر يتدخل في السوق لو حصل أي تقلبات.. وده بيعزز الثقة في الاقتصاد المصري بشكل عام.
طب وإيه الشروط المتوقعة للاتفاق ده؟
المعلومات المتاحة بتقول إن قطر هتدفع مليار دولار لمصر فور توقيع الصفقة.. وباقي المبلغ هيتحول خلال الـ 12 شهر اللي بعد كده.. يعني سيولة هتدخل البلد على طول.. وده خبر يطمن جداً.
ولحد دلوقتي مفيش أي تعليق رسمي من المسؤولين في مصر أو قطر على الموضوع ده.. بس الاتنين كانوا أعلنوا في شهر أبريل اللي فات إنهم ناوين “يشتغلوا عشان” يضخوا حزمة استثمارية لمصر بقيمة 7.5 مليار دولار.. بس ساعتها محددوش إطار زمني.. لو الصفقة دي تمت.. هتكون قطر بتلعب دور أكبر في تعافي الاقتصاد المصري.. خصوصاً بعد حزمة الإنقاذ المالي اللي مصر خدتها بـ 57 مليار دولار.. واللي كان فيها دعم من صندوق النقد الدولي والاتحاد الأوروبي.
ودلوقتي الحكومة بتسعى إنها تكرر تجربة صفقة راس الحكمة من جديد .. الرئيس السيسي أصدر مرسوم الأسبوع اللي فات بتخصيص 174.4 كيلومتر مربع من الأراضي المملوكة للدولة على ساحل البحر الأحمر لوزارة المالية.. الحكومة وضحت إن الأرض دي هتستخدم كضمان لإصدار صكوك سيادية إسلامية.. وهتشمل مشروعات سياحية وعقارية.. يعني بنشوف تحركات جدية على الأرض.
طب وفين الكويت والسعودية؟
على نفس الخط.. وكالة بلومبرج قالت إن الكويت بتخطط لتحرك مشابه.. ممكن يتضمن استخدام 4 مليارات دولار من الودائع بتاعتها.. لكن الـ 3.5 مليار دولار اللي قطر بتناقشها تعتبر سيولة جديدة بالكامل.. وده فرق مهم جدا.. كمان السعودية داخلة فى مفاوضات على مشروعات كبرى فى مصر ممكن تغير فواعد اللعبة الاقتصادية تماما.
التعليقات