أخبار لايت: هدوء حذر في سوق الدهب.. ارتفاع أسعار الدواجن.. وتعاون مهم مع الصين

رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، هدوء حذر في سوق الدهب، وارتفاع أسعار الدواجن، وتعاون مهم مع الصين.

والبداية من سوق الصاغة، واللي فيه أسعار الذهب استقرت مع أول تعاملات النهارده، عند نفس المستويات اللي قفلت عليها امبارح الجمعة، بعد ما سعر جرام الذهب عيار 21 وصل لـ 6655 جنيه.

أسعار الذهب النهارده:

جرام الذهب عيار 24 سجّل حوالي 7605 جنيه.

جرام الذهب عيار 21 وصل لنحو 6655 جنيه.

جرام الذهب عيار 18 سجّل حوالي 5704 جنيه.

سعر الجنيه الذهب بلغ 53240 جنيه.

وسعر الأوقية عالميًا سجّل 4978 دولار.

وفي نفس السياق، بنك أوف أمريكا متوقع إن متوسط السعر الحقيقي للذهب يوصل لحوالي 4538 دولار للأوقية خلال سنة 2026، مع ترجيحات بارتفاع أسعار الفضة والبلاتين والبلاديوم.

ومن جانبه، قال مايكل ويدمر، رئيس أبحاث المعادن في بنك أوف أمريكا، إن الفضة ممكن تكون أكتر جاذبية للمستثمرين اللي عندهم قابلية أعلى للمخاطرة، خصوصًا إن نسبة الذهب للفضة حاليًا وصلت لحوالي 59، وده مقارنة بأقل مستويات تاريخية كانت 32 سنة 2011 و14 سنة 1980.

ونروح بقى لأسعار الفراخ البيضاء والساسو، واللي شهدت ارتفاع بقيمة 4 جنيهات النهاردة في الأسواق المحلية وبورصة الدواجن، بعد سلسلة من الانخفاضات اليومية اللي حصلت خلال الأيام اللي فاتت، وده بسبب وفرة المعروض من الدواجن وزيادة الإنتاج، مع استقرار الطلب من المواطنين.

وجات الأسعار النهارده في بورصة الدواجن كالتالي:

أسعار الفراخ البيضاء:

سعر الكيلو في البورصة وصل لـ 71 جنيه، بعد ما كان 67 جنيه امبارح.

أسعار الفراخ الساسو:

الفراخ الحمرا الساسو سجّلت أسعار بتتراوح حوالي 93 جنيه للكيلو في البورصة.

أسعار الكتاكيت:

سعر الكتكوت الأبيض وصل لـ 13 جنيه
والكتكوت الساسو سجّل حوالي 8 جنيهات.

ونختم بخبر مهم، وده استمرارًا لتنفيذ الرؤية الاستراتيجية للمنطقة الاقتصادية لقناة السويس، واللي بتهدف لبناء قاعدة صناعية قوية ومتطورة، عن طريق جذب استثمارات نوعية، وتعميق التصنيع المحلي، وتعزيز التكامل مع سلاسل القيمة العالمية.

المركز الإعلامي لمجلس الوزراء أعلن عن توقيع عقد لإنشاء مجمع صناعي لإنتاج المنتجات الصحية، مع شركة “تونج لينج جييا للتكنولوجيا الحيوية”، بطاقة إنتاجية سنوية توصل لـ 10 مليارات قطعة مناديل مبللة، وملياري حفاضة أطفال، و100 ألف طن أقمشة غير منسوجة.